Sunday, August 11, 2019

దత్తపది - కాక తాత పాప మామ

కాక, తాత, పాప, మామ - రామాయణార్థంతో స్వేచ్ఛాఛందంలో పద్యం. శంకరాభరణం బ్లాగులో నేటి దత్తపది.

స్థితప్రజ్ఞుఁడు రాముఁడు

సీ. కైక కోరికవల్ల కాకపోయెను వేడ్క , కడ కేఁగ వలసెను కానలకును
తాతతాతది యవతారమె చూడంగ, తాతవేలుపు వ్రాత తప్పలేదు
శాప మేనాటిదో పాపమవ్విధమున, నేలపట్టి నడచెఁ గాలిబాట
మామక మనుకున్న కామితభోగముల్, చేజారిపోయెను చిటికెలోన

తే. ఇన్ని కష్టముల్ జనియించె నిన కులునకు
నైన నావంత కోపమ్ముఁ బూన డతఁడు
కొండకోనల తిరుగాడుచుండి కూడ
చిరునగవు మోమున నొకింత చెరుగ దెపుడు

తాతతాత - విష్ణువు
తాతవేలుపు - బ్రహ్మ
మామకము - నాది

No comments:

Post a Comment