అలవైకుంఠపురంబులో (శ్రవ్యకము)

అల వైకుంఠపురంబులో నగరిలో నా మూలసౌధంబు దా
పల మందారవనాంతరామృతసరః ప్రాంతేందు కాంతోపలో
త్పల పర్యంక రమావినోదియగు నాపన్నప్రసన్నుండు వి
హ్వల నాగేంద్రము పాహిపాహియనఁ గుయ్యాలించి సంరంభి యై

సిరికిం జెప్పడు శంఖచక్ర యుగముం జేదోయి సంధింపఁడే
పరివారంబును జీరఁ డభ్రకపతిం బన్నింపఁ డాకర్ణికాం
తర ధమ్మిల్లముఁ జక్కనొత్తఁడు వివాద ప్రోధ్ధిత శ్రీ కుచో
పరి చేలాంచలమైన వీడడు గజప్రాణావనోత్సాహియై

కందత్రికము

శ్రీమదాంధ్రభాగవత ప్రధమ స్కంధములోని ఈ మూడు కందాలు చూడండి - ఒకదాన్ని పోలి ఇంకోటి భలే ఉన్నాయి కదూ.

మొదటిది శౌనకాది మునులు నితాంత కురుణోపేతుడైన సూతుణ్ణి పురాణపంక్తు లితిహాస శ్రేణులు ధర్మశాస్త్రముల సూక్ష్మాలని తెలుపమని ప్రస్తుతించడము

మన్నాఁడవు చిరకాలము,
గన్నాఁడవు పెక్కులైన గ్రంథార్థంబుల్
విన్నాఁడవు వినఁదగినవి,
యున్నాఁడవు పెద్దలొద్ద నుత్తమగోష్ఠిన్

రెండవది, శ్రీకృష్ణ పరమాత్ముడు కురుయుధ్ధానంతరము తన ప్రియపురంబైన ద్వారకానగరానికి చేరినంతనే జనులు భగవత్పాదాబ్జములను బ్రహ్మపూజ్యములుగా భావించి పూజించిన పిదప పలికిన పలుకులు

ఉన్నారము సౌఖ్యంబున
విన్నారము నీ ప్రతాప విక్రమ కథలన్
మన్నారము ధనికులమై
కన్నారము తావ కాంఘ్రికమలములు హరీ

మూడవది తీర్థయాత్రలకు వెళ్ళి మైత్రేయాదులను కలిసి కర్మయోగ సూక్ష్మాలు తెలుసుకొని, హస్తినకు తిరిగి వచ్చిన విదురుణ్ణి ధర్మరాజు కుశలప్రశ్నలు వేస్తున్న సందర్భము.

మన్నారా, ద్వారకలో
నున్నారా యదువు లంబుజోదరు కరుణన్
గన్నారా లోకులచే
విన్నారా మీరు వారి విధమెట్టిదియో

మద్భావజాలావిష్కృతి

శ్రీకైవల్య పదంబుఁ జేరుటకునై చింతించెదన్ లోకర
క్షైకారంభకు భక్తపాలన కళాసంరంభకున్ దానవో
ద్రేకస్తంభకుఁ గేళిలోలవిలసద్దృగ్జాల సంభూత నా
నాకంజాత భవాండ కుంభకు మహానందాంగనా డింభకున్

శ్రీమదాంధ్రభాగవతములో ఆది మఱియు ఆవర్తనీయమైన పద్యముతో నా కొత్త గూటికి శుభారంభము
చేస్తున్నాను.

ఈ గూటిన నాకు నచ్చిన పద్యగద్యాలు, పుస్తకాలు, నా అనుభవాలు వాటికి నా ప్రతిస్పందనలు - ఒహటేమిటి - మనసుకి నచ్చినది ఆవిషృతము చేయడానికి పూనుకుంటున్నాను.